नागपूर : काटोलमध्ये माजी मंत्री आ. अनिल देशमुख यांच्याविरोधात दंड थोपटत युवक काँग्रेसचे प्रदेश सरचिटणीस याज्ञवल्क्य जिचकार यांनी शुक्रवारी उमेदवारी अर्ज दाखल केला. तर, इकडे उमरेडमध्ये भाजपमधून इच्छुक असलेले प्रमोद घरडे आणि त्यांच्या पत्नी रूपाली घरडे या दाम्पत्याने उमेदवारी अर्ज दाखल करीत राजकीय खेळी खेळण्याचा प्रयत्न केला.
दरम्यान, “राज्याचे माजी अर्थमंत्री दिवगंत श्रीकांत जिचकार यांचे चिरंजीव याज्ञवल्क्य जिचकार यांनी त्यांच्याविरोधात बंडाचे निशाण फडकावले आहे. काहीही झाले तरी आपण माघार घेणार नाही, असा इशाराही त्यांनी दिला आहे.”
काटोल-उमरेड मतदारसंघात बंडाचा झेंडा!
काटोल आणि उमरेड मतदारसंघात या दोन्ही आघाड्यांत नाराजांनी बंडाचा झेंडा हाती घेतला आहे. काटोलमध्ये माजी मंत्री अनिल देशमुख यांच्याविरोधात दंड थोपटत युवक काँग्रेसचे प्रदेश सरचिटणीस याज्ञवल्क्य जिचकार यांनी शुक्रवारी उमेदवारी अर्ज दाखल केला. इकडे उमरेडमध्ये भाजपमधून इच्छुक असलेले प्रमोद घरडे आणि त्यांच्या पत्नी रूपाली घरडे या दाम्पत्याने उमेदवारी अर्ज दाखल करीत राजकीय खेळी खेळण्याचा प्रयत्न केला.
महायुतीत बंडखोरी!
दोघांनीही भाजप आणि अपक्ष असे प्रत्येकी दोन अर्ज सादर केले आहेत. तसेच राष्ट्रवादी कॉंग्रेसचे (अजित पवार) विलास झोडापे यांनी सुद्धा अपक्ष अर्ज सादर केला. त्यामुळे उमरेडमध्ये महायुतीतही बंडखोरी होण्याचे संकेत आहे. याशिवाय उमरेडमध्ये संदीप कांबळे, प्रमोद बावनगडे यांनीही अपक्ष उमेदवारी अर्ज दाखल केला आहे. काटोलमध्ये जिचकर यांनी समर्थकांसह कृषी उत्पन्न बाजार समिती येथून रॅली काढत तहसील कार्यालयात दाखल झाले. यानंतर निवडणूक निर्णय अधिकारी पीयूष चिवंडे यांच्याकडे उमेदवारी अर्ज दाखल केला. सोबत त्यांच्या आई राजश्री श्रीकांत जिचकार, मैत्री जिचकार, सुरेंद्र जिचकार आदी उपस्थित होते. कामठीत जय विदर्भ पार्टीचे प्रशांत अनिल नखाते यांनीही अर्ज दाखल केला असल्याचे समजते.
