मुंबई : महाराष्ट्रातील विधानसभा निवडणुकांची घोषणा होताच सर्वच पक्षांकडून जोरदार तयारी सुरु झाली आहे. येत्या २० नोव्हेंबर २०२४ ला महाराष्ट्रात विधानसभा निवडणूक पार पडणार आहे. तर तीन दिवसांनी २३ नोव्हेंबर रोजी विधानसभा निवडणुकांचे निकालही जाहीर होतील. विधानसभा निवडणुकांच्या पार्श्वभूमीवर सध्या सर्वच पक्ष जागावाटपावर चर्चा करत आहे. लवकरच सर्वच पक्षांकडून उमेदवारांची घोषणा केली जाणार आहे. त्यातच आता शिवसेना ठाकरे गटाचे नेते अनिल परब यांनी एक मोठा दावा केला आहे.
दरम्यान, नुकतेच शिवसेना ठाकरे गटाचा एक मेळावा आयोजित करण्यात आला होता. यावेळी अनिल परब यांनी उद्धव ठाकरेंबद्दल एक मोठा दावा केला आहे. ते म्हणाले, की महाविकास आघाडीतून पुढील मुख्यमंत्री उद्धव ठाकरेच होतील, असा विश्वास त्यांनी व्यक्त केला आहे.
नेमके काय म्हणाले अनिल परब?
विधानसभा निवडणुकीत ज्या ज्या मतदारसंघात उद्धव ठाकरेंना मानणारा मतदार आहे. तिथे महाविकास आघाडीचाच उमेदवार विजयी होईल. तसेच मी आज तुम्हाला सांगतो की, निवडणुकीत महाविकास आघाडीच जिंकणार आहे आणि महाविकास आघाडीचीच सत्ता येणार आहे. महाविकास आघाडीमधून उद्धव ठाकरे हेच मुख्यमंत्री होतील, असे अनिल परब यांनी स्पष्ट केले आहे.
वरुण सरदेसाई निवडणूक लढवणार!
मुंबई पदवीधर मतदारसंघाच्या निवडणुकीसाठी वरुण सरदेसाई इच्छुक होते. मात्र ऐनवेळी अनिल परब यांना उमेदवारी दिल्याने वरुण सरदेसाई नाराज झाले होते. यानंतर आता त्यांची नाराजी दूर करण्यासाठी ठाकरे गटाकडून मोठी खेळी केली जाणार आहे. गेल्या काही दिवसांपासून वांद्रे पूर्वे विधानसभा मतदारसंघातून वरुण सरदेसाई हे निवडणूक लढवणार असल्याचे बोलले जात आहे. त्यातच आता अनिल परब यांनी गट प्रमुख मेळाव्यातून मोठा दावा केला आहे. वरूण सरदेसाई हे बांद्रा विधानसभा निवडणूक लढवणार आहेत आणि ते जिंकणार असा विश्वास मला आहे, असे अनिल परब यांनी म्हटले आहे.
वरुण सरदेसाईंची मोर्चेबांधणी सुरु!
वरुण सरदेसाई या मतदारसंघातून निवडणूक लढले तर त्यांची लढत ही आमदार झिशान सिद्दीकी यांच्या विरोधात होऊ शकते, असे बोलले जात आहे. सध्या वरुण सरदेसाई हे या मतदारसंघात मोर्चेबांधणी करत आहेत. वरुण सरदेसाई यांनी पक्षाच्या शाखांना भेटी देणे, सामाजिक उपक्रम राबवणे सुरु केले आहे. तसेच त्यांनी आपल्या अधिकृत ट्विटर अकाउंटवर या सामाजिक उपक्रमांचे आणि छत्रीवाटपाचे फोटो देखील शेअर केले आहेत. त्यामुळे सध्या झिशान सिद्दीकीविरुद्ध वरुण सरदेसाई यांनी मोर्चेबांधणी करण्यास सुरुवात केल्याचे दिसत आहेत.
