मुंबई : राज्य शासनाच्या सांस्कृतिक कार्य विभागामार्फत प्रदान करण्यात येणारे विविध पुरस्कार जाहीर झाले असून, यात संगीत आणि गायन क्षेत्रातील सातत्यपूर्ण आणि अमूल्य योगदानाबद्दल ज्येष्ठ गायिका अनुराधा पौडवाल यांना २०२४ चा गानसम्राज्ञी लता मंगेशकर पुरस्कार जाहीर झालेला आहे.
सांस्कृतिक पुरस्कारांची घोषणा सांस्कृतिक कार्यमंत्री सुधीर मुनगंटीवार ( Sudhir mungantiwar) यांनी केली आहे. तसेच, मुनगंटीवार यांच्या अध्यक्षतेखाली तज्ञांची समिती या पुरस्कारांची शिफारस करत असते. विविध क्षेत्रात योगदान देणाऱ्या मान्यवरांना पुरस्काराने गौरविण्यात येणार असल्याचे मुनगंटीवार म्हणाले आहे. दरम्यान, नटवर्य प्रभाकर पणशीकर रंगभूमी जीवनगौरव पुरस्कार, संगीताचार्य अण्णासाहेब किर्लोस्कर संगीत रंगभूमी जीवन गौरव पुरस्कार, भारतरत्न पंडित भीमसेन जोशी शास्त्रीय संगीत जीवन गौरव पुरस्कार, ज्ञानोबा तुकाराम पुरस्कार, तमाशा सम्राज्ञी विठाबाई नारायणगांवकर जीवनगौरव पुरस्कार अश्या पुरस्कारांची घोषणा देखील मुनगंटीवार यांनी केली आहे.
अनुराधा पौडवाल यांना लता मंगेशकर पुरस्कार!
संगीत आणि गायन क्षेत्रातील अमूल्य योगदानासाठी प्रसिद्ध ज्येष्ठ गायिका अनुराधा पौडवाल यांना यंदाचा लता मंगेशकर पुरस्कार जाहीर करण्यात आला आहे. शास्त्रीय संगीतासाठी ज्यांनी आपले जीवन समर्पण केले आणि शास्त्रीय संगीत क्षेत्राची सेवा केली, त्या कलाकारांच्या योगदानाबद्दल दिला जाणारा भारतरत्न पंडीत भीमसेन जोशी शास्त्रीय संगीत जीवन गौरव पुरस्कार आरती अंकलीकर यांना घोषित करण्यात आला आहे.
कुणाला कुठला पुरस्कार जाहीर?
नटवर्य प्रभाकर पणशीकर रंगभूमी जीवन गौरव पुरस्कार २०२४ साठी मराठी रंगभूमीवर कार्यकर्तृत्वाचा ठसा उमटवणाऱ्या प्रकाश बुध्दीसागर यांना जाहीर झाला आहे. संगीताचार्य अण्णासाहेब किर्लोस्कर संगीत रंगभूमी जीवनगौरव २०२४ चा पुरस्कार श्रीमती शुभदा दादरकर यांना जाहीर झाला आहे. संगीत रंगभूमीसाठी दिलेल्या विशेष योगदानाबद्दल त्यांना गौरविण्यात आले आहे. संत साहित्यावर लेखन आणि संतांना अभिप्रेत मानवतावादी कार्याबद्दल २०२४ चा ज्ञानोबा तुकाराम पुरस्कार संजयजी महाराज पाचपोर यांना जाहीर झाला आहे. नाटक या विभागासाठी २०२४ चा पुरस्कार विशाखा सुभेदार यांना जाहीर झाला आहे. उपशास्त्रीय संगीत वर्गवारीमध्ये २०२४ चा पुरस्कार डॉ. विकास कशाळकर, कंठसंगीत प्रकारातील २०२४ चा पुरस्कार सुदेश भोसले यांना घोषित झाला आहे. लोककला क्षेत्रातील २०२४ चा पुरस्कार अभिमन्यू धर्माजी सावदेकर आणि शाहीरी क्षेत्रातील २०२४ चा पुरस्कार, शाहीर राजेंद्र कांबळे यांना घोषित झाला आहे.
चित्रपट क्षेत्रासाठी रोहिणी हट्टंगडी यांना पुरस्कार!
चित्रपट क्षेत्रासाठी २०२४ चा पुरस्कार रोहिणी हट्टंगडी यांना घोषीत झाला आहे. दरम्यान, पुरस्कार जाहीर झाल्यानंतर त्या म्हणाल्या की, कुठलाही पुरस्कार मिळाल्यानंतर बरे वाटते तसेच, कलाकार म्हणून दाद घेतल्याने देखील बरे वाटते. महाराष्ट्र सरकारकडून पुरस्कार मिळाल्याने अत्यंत आनंदी वाटत आहे, अशी प्रतिक्रिया त्यांनी दिली.
